A Asociación de Xornalistas de Galicia outorgou por unanimidade a Ramón Pernas o Premio José Luis Alvite 2023, ao considerar que “atesora unha longa e brillante traxectoria como articulista e columnista, ademais de ter exercido durante décadas, con éxito, o oficio de xornalista nas súas máis diversas vertentes, incluídos varios cargos de responsabilidade en medios de comunicación, nos que tamén deu mostra da súa capacidade profesional”.

“E todo iso -prosegue-, sen deixar de destacar, por suposto, as súas facetas editorial e creativa, que comprenden un laureado percorrido novelístico, o que reforza e avala o seu perfil como lúcido analista da realidade da nosa sociedade e convérteno nunha referencia inescusable do panorama mediático galego”.

Ramón Pernas, xornalista de vocación, naceu na localidade lucense de Viveiro. É licenciado en Ciencias da Información pola Universidade Complutense de Madrid, onde tamén estudou Socioloxía. Entre outros postos destacados en publicacións, foi subdirector de Nova Empresa e director de Actual.

Tamén exerceu como columnista e crítico literario nas revistas Interviú e Tempo, como columnista na axencia OTR Press e no xornal El Progreso de Lugo, ademais de ser guionista para o espazo de Televisión Española (TVE) “Se eu fose presidente” e colaborador de diversos programas da pequena pantalla. Actualmente, escribe unha columna semanal no xornal La Voz de Galicia.

O seu labor en medios de comunicación mereceu outros prestixiosos galardóns do xornalismo galego, como o Premio Nacional Julio Camba ou o Premio Puro Cora. Tamén foi presidente do Club de Xornalistas Galegos en Madrid.

Noutros ámbitos, o José Luis Alvite 2023 foi director editorial de Espasa Calpe durante dez anos, e director xeral e fundador de Ámbito Cultural de El Corte Inglés. Como novelista, é autor dunha ducia de títulos (Si tú me dices ven, a súa primeira novela, en 1996, Pabellón Azul, Paso a dous, Brumario, Libro de actas, Del viento y la memoria, En la luz inmóvil, Hotel Paradiso, O libro de Jonás, O libro dos adeuses).

Publicou unha antoloxía poética (Poesía (in)completa), o libro ilustrado Cen anos de circo en España -con José Mario Armero- e participou en varias obras colectivas. A súa actividade como escritor valeulle numerosos galardóns literarios: Ateneo de Sevilla, Internacional de Novela Emilio Alarcos, Letras de Bretaña, Azorín de Novela e Café Varela, este último, ao conxunto da súa obra. Ademais, foi finalista do Premio Nacional de Literatura (coa súa obra “Paso a dous”).

Xunto a iso, Pernas pronunciou numerosas conferencias, foi creador do Premio Primavera de Narrativa e participou como xurado en múltiples galardóns literarios. Parte da súa obra narrativa está traducida a outros idiomas, é medalla de ouro de O Heraldo de Viveiro -o semanario local da súa localidade natal-, e académico de número da Real e Pontificia Academia Auriense Mindoniense de San Rosendo.

O Premio José Luis Alvite alcanzou este ano a súa oitava edición, refrendando cada ano o seu propósito de manter viva a memoria do extraordinario creador compostelán que lle dá nome.

Pernas (Alvite 2023): “La libertad de prensa, columna dorsal de la democracia”