Revista Comunica

"Comunica": espazo de reflexión e análise sobre a profesión xornalística

A APG comezou en 2004 a publicación dunha revista en papel con traballos sobre xornalismo e comunicación coa intención de ser unha publicación galega sobre eses eidos, en tódalas súas posibles vertentes e modalidades. “Comunica” publica traballos de investigación, artigos ou recensións sobre o mundo da información que demostren interese para ser difundidos. O Consello Asesor de Redacción vela polo mantemento deste principio editorial. Os traballos están conformados por artigos, estudos ou informes dedicados a aspectos moi variados dentro do ámbito da comunicación e da profesión xornalística. “Comunica” estará aberta á colaboración de tódolos profesionais, docentes e investigadores das facultades de Comunicación de Galicia que queiran ofrecer as súas achegas.

Informe "O estado da innovación na comunicación en Galicia".

O último número de “Comunica” contén o informe “O estado da innovación na comunicación en Galicia”, que inclúe artigos de 25 académicos e profesionais especialistas na materia e unha enquisa respondida por 111 profesionais da comunidade autónoma. O número 10 da revista foi dirixido polo catedrático de Xornalismo da USC, Francisco Campos Freire.

Descargar PDF

Unha aproximación á innovación, que forma parte do ADN da comunicación en Galicia.

María Méndez.

Neste número da nosa revista, “Comunica” toma como obxecto de estudo e referencia científica a denominación e clasificación da estatística internacional, adoptada pola UNESCO e Eurostat, para analizar a innovación e o estado das industrias culturais, da comunicación, das TIC e o coñecemento (ICC) en Galicia. Como diagnóstico de opinión, ofrécese unha enquisa sobre o estado da innovación, enviada a máis de 340 profesionais dos principais sectores das actividades produtivas das industrias culturais, da comunicación e do coñecemento. A edición número 10 de “Comunica” inclúe ademais artigos de vintecinco profesores da Universidade galega e profesionais da comunicación en todas as súas vertentes expresivas. As ICC representan na actualidade un 2% (1.500 millóns de euros da facturación anual) da economía de Galicia, mesma porcentaxe que no conxunto da Unión Europea (200.000 millóns de euros de facturación anual e 9 millóns de empregos).

“Comunica”, no formato dixital que adquiriu dende a súa redición, está accesible a través do PDF que inclúe esta páxina.

LER MÁIS

Nun primeiro capítulo introdutorio realízase un encadre da estrutura das industrias da comunicación, da información (TIC) e da cultura en Galicia, así como do que representan para a economía da nosa comunidade autónoma. Este número inclúe análises sobre o I+D+I, a prensa impresa, a televisión, a ficción audiovisual, o sector da radio e o audio, o ecosistema dixital, a comunicación publicitaria, a perspectiva da diplomacia cultural, a comunicación política, a comunicación institucional, a comunicación corporativa empresarial, a comunicación musical, as artes escénicas, a comunicación artística, os fitos da fotografía, as tendencias do deseño en Galicia, e as características das marcas territoriais Galicia Calidade e Xacobeo.