Faino como plataforma para a análise das consecuencias que para sector pode ter esta nacente ferramenta tecnolóxica; como un espazo de debate sobre as enormes incógnitas, mais tamén sobre as imprevisibles oportunidades que a súa aplicación xerará no noso eido laboral e social.

Móvenos un grande interese por achegarnos a unha cuestión que, de seguro, será obxecto de sisudas análises e múltiples valoracións nas próximas décadas. Agora, soamente o talante curioso e xeneroso dos que contribuíron ao relato desta publicación nos permitirá dispoñer dun punto de partida sobre o cal construír argumentos que reflictan a nosa implicación absoluta co devir profesional.

A intelixencia artificial, lonxe de ser un asunto alleo á evolución da nosa profesión, podería inducir nela unha auténtica revolución. E non queremos nin podemos quedarnos á marxe da súa implementación. Por iso, quixemos contar coa colaboración de ilustres compañeiros, colegas, profesores, científicos, académicos, técnicos e profesionais, que nos ofrecen a súa particular visión arredor desta área dun modo práctico, sinxelo e didáctico; unhas lecturas que estamos seguros de que espertarán o interese da profesión, pero tamén do resto da sociedade. A nosa enorme gratitude para tódalas persoas que colaboraron neste Comunica que rexorde co desexo de poder seguir achegando o noso gran de area para a construción dun futuro mellor, sempre coa comunicación como pano de fondo.