O galardoado deste ano xogou un papel decisivo no nacemento e desenvolvemento dos medios de comunicación públicos de Galicia
O titular do Goberno galego, Alberto Núñez Feijóo, e a presidenta da Asociación de Xornalistas de Galicia (APG), María Méndez, encabezaron o acto de entrega do Premio Diego Bernal 2021, que outorga a Asociación de Xornalistas de Galicia e que, nesta edición, concedeu a Arturo Maneiro Vila.
Núñez Feijóo eloxiou ao galardoado por “a súa longa e importante traxectoria, polo seu traballo polivalente nos medios, e pola súa fonda pegada no nacemento, crecemento e consolidación dos medios públicos galegos, xa que naquel momento”, afirmou, “cun autogoberno galego incipiente, Maneiro comprendeu a Galicia, porque era necesario completar o autogoberno cuns medios públicos que emitisen en galego as 24 horas”.
O presidente tamén destacou a función “fundamental que xogan os medios galegos para poder entender Galicia”. Nesta liña afirmou que, “do mesmo xeito que hai políticas que fan e dialogan -e outras que desfán e monologan-, os medios galegos teñen no seu haber o logro de contribuír á construción dun país que viviu séculos incomunicado”, referíndose a “unha opinión pública vigorosa e crítica, ademais de tolerante”.
Laudatio de Alfonso Cabaleiro
O xornalista e directivo da APG Alfonso Cabaleiro, director-xerente de Galicia Calidade e ex secretario de Comunicación da Xunta (2003-2005 e 2009-2012), foi o encargado de facer a laudatio do premiado.
Cabaleiro repasou parte da vida profesional, e tamén persoal, de Maneiro, de quen subliñou “a súa vocación, o seu rigor informativo e a súa coherencia, así como o seu empeño na promoción de mulleres xornalistas”. “Ademais”, asegurou, “Maneiro empeñouse en crear unha asociación de xornalistas en Galicia e, máis adiante, un órgano colexiado”.
Maneiro: “Seguir traballando nunha profesión emocionante”
Pola súa banda, o galardoado encomendou aos compañeiros a tarefa de “seguir traballando nunha profesión emocionante”, antes de recibir o premio -unha cuncha de vieira de prata- de mans do titular da Xunta. Ademais, a APG fíxolle entrega dun obsequio sorpresa: un libro no que xornalistas de renome na comunidade e compañeiros de Maneiro repasan a súa traxectoria, facendo fincapé no seu impacto “persoal e profesional” no mundo do xornalismo.
A presidenta da APG, María Méndez, quixo chamar a atención sobre “a coraxe e empuxe” de Maneiro, que estendeu tamén a toda a profesión. “Uns valores cos que”, indicou, “mellorouse a profesión, aínda que é unha melloría na que hai que seguir empeñándose para incrementar o prestixio social do xornalismo”.
Toda unha vida dedicada á comunicación
A APG acordou por unanimidade outorgar o Diego Bernal 2021 a Maneiro por “a súa dilatada traxectoria profesional, na que asumiu postos de alta responsabilidade e dirección nos medios públicos autonómicos”. Recoñece ademais “o seu labor en favor do asociacionismo profesional”.
